BAGUIO CITY- Natiketan ti dua nga indibdiual kalpasan a naaktuwan ti iligal a panangibiaheda kadagiti indibidual pastrek ditoy siudad ti Baguio idi kalman.
Maibasar iti report, pinara dagiti pulis ti maysa nga SUV nga addaan ti plaka a DAN 8142 nga imanmaneho ni Bernardo Delantar.
Nupay kasta, napaay daytoy a mangiparang kadagiti kaskenan a dokumento a mangpaneknek a legal ti panangibiyahena kadagiti pasaherona.
Naduktalan iti panagsukimat dagiti pulis a nagbayad dagiti innem a pasahero iti P3,000.
Kabayatanna, pinara met dagiti pulisya ti maysa a kotse nga addaan ti plaka nga NGJ 6831 nga imanmaneho ni Rheneil Talania.
Napaay metlaeng daytoy a mangiparang kadagiti dokumento para iti panangibiahena kadagiti dua a pasaherona.
Agpada a naipaayan dagiti dua a drivers iti citation ticket bayat a naiturong iti Central Triage dagiti pasahero para iti health assesment dagitoy.
Kabayatana, natiliw ti dua nga indibidual kalpasan a naaktuwan ti manarimaan a pot session dagitoy sadiay Central Balili, La Trinidad, Benguet idi kalman.
Nabigbig dagitoy a da Nestor Fuenticilla alyas Dong, 30-anyos, vendor, tubo ti Pangasinan, residente ti Baguio City ken ni Roderick Rodriguez, 47-anyos, bagger, tubo ti Pangasinan, residente ti La Trinidad, Benguet.
Maibasar iti report, nagresponde dagiti pulis iti naawatda a tawag mainaig iti manarimaan a pot session.
Naaktuwanda sadiay ti panagaramat dagiti dua nga indibidual iti iligal a droga ken nakumpiskarda ti maysa a pakete ti maatap a shabu nga agdagsen ti 0.5 gram, maysa nga aluminum foils ken dadduma pay a drug paraphernalia.
Naamuan a maibilbilang ni Rodriguez kas Street Level Individual bayat a ni Fuenticillia ket maibilbilang a Regional Top 10 Drug Personality.
Sumangsangon dagitoy iti kaso a panaglabsing iti RA 9165 wenno ti Comprehensive Dangerous Drugs Act of 2002.
