BAGUIO CITY – Pinadayawan ni Mayor Mauricio Domogan ti dua a kameng ti Baguio City Police Office gapu iti panangkemmegda kadagiti manibrong.
Nabigbig dagitoy a da PO3 Patrick Lamog ken ni PO2 Marlon Verbo.
Malaksid iti daytoy, babaen iti resolution Number 089 ket pinadayawan ti lokal a gobierno ti Baguio ni Raul Frigillana a guwardya ti Teachers Camp gapu iti panangisublina iti wallet a naglaun iti dakkel a gatad ti kuwarta ken nagduduma nga identification cards ni Shiela Marie Vallador.
Gapu iti daytoy, kinuna ni Mayor Domogan a pammaneknek laeng daytoy a dagiti umili ken residente ti siudad ken nasisingpet, mapagtalkan ken maikarida iti nasao a pammadayaw.
Maipalagip nga adu metten a residente ti siudad ti pinadayawan ti lokal a gobierno ti Baguio gapu iti panangisublida iti sanikua ken kuwarta ti dadduma nga indibidual.
