BAGUIO CITY — Nakabaluden ti dua a bakla a nagtakaw ken nangdangdangran iti maysa a sales lady iti maysa nga stall sadiay Abanao Street, siudad ti Baguio idi agsapa.
Nabigbig dagitoy a da MJhay Blancada Perol, 28-anyos ken residente ti Cubao, Quezon City ken ni Andrei Tuzon, adda iti legal nga edad ken residente ti Nueva Ecija.
Nabigbig met ti biktima a ni Dianne Banga-an, 25-anyos, sales lady ken residente ti Imelda Marcos, Baguio City a nagsagrap ti nauneg a dunor ngem addan ita iti nasayaat a kasasaad.
Sigun kenni PCI Marlo Evasco, commander ti Baguio City Police Office – Station 7, nagturong ti dua a bakla iti stall a bambantayan ti biktima ken nagpammarangda a customer.
Bayat nga agpilpili dagiti dua, inayaban ti biktima ti kaduana nga agbambantay iti maysa pay nga stall dagitoy tapnu tumulong iti panakabalkot dagiti gatangen dagiti suspek.
Nabati ti biktima kalpasan a pimmanaw ti kaduana idi nabalkotdan dagiti gatangen kuma dagiti suspek kas iti bado, kaldero ken sapatos.
Kinuna ni Evasco a bayat nga ur-urayen ti biktima ti panagbayad dagiti suspek ket killaat a kinornerda daytoy iti igid ti stall ken sadiay a binusalanda ti ngiwat ti biktima sakbayda a binekkel daytoy.
Nagala pay iti kayo dagiti suspek ken impang-urda iti ulo ti biktima sakbayda a pimmanaw nga imetda dagiti nabalkot nga order ken ti belt bag ti biktima.
Nupay kasta, nabaelan ti biktima a nagpaarayat isut gapuna a naiturong daytoy iti pagagasan bayat a nakemmeg da Perol iti naisayangkat a hot pursuit operation.
Nakumpiskar manipud kadagitoy dagiti tinakawda nga aggatad ti nasurok P10K, pakairamanan ti collection ti biktima.
