BAGUIO CITY – Nadiskubre ti 50th Infantry Battalion (IB) ti Philippine Army ti dua a kampo dagiti mapapati a New People’s Army (NPA) sadiay munisipyo ti Balbalan, probinsia ti Kalinga.
Sigun kenni Lt. Col. Gulliver Señires, Commanding Officer ti 50th IB-PA, naduktalanda idi Pebrero 14 ti maysa a training camp dagiti NPA sadiay Barangay Ababa-an ken posible a kapampanaw laeng dagiti rebelde idi simmangpet sadiay dagiti soldado gaputa naibati ti nagturongan dagitoy.
Nasarakanda met ti maikadua a kampo dagiti NPA idi Pebrero 23 sadiay Sitio Guin-ang, Barangay Dao-angan no sadino, mapapati a sadiay a rinambakan ti grupo ti anibersaryo ti CPP-NPA idi Disyembre ti napalabas a tawen.
Kinunana a nadiskubreda dagiti nasao a kampo dagiti NPA babaen iti impormasyon manipud kadagiti residente iti nasao a lugar.
Naamuanda pay a dagiti nasao a kampo ket negserbi a temporaryo a balay dagiti NPA kabayatan ti panagurnong dagitoy iti taraon manipud kadagiti residente ti Balbalan.
Kabayatanna, inaklon ni Lt. Col. Señires nga adda ti namonitorda a presensia dagiti NPA iti nagbeddengan ti munisipyo ti Pinukpuk ken Balbalan.
Gapu iti daytoy, inyapelana ti saan a panangipaay dagiti residente iti atension kadagiti NPA nangruna dagiti agaw-awis para iti panakikappeng iti nasao a grupo.
Agtultuloy met ti nainget a combat operations ti militar kontra kadagiti NPA tapnu maipasigurado ti kinatalged dagiti agnanaed sadiay Kalinga.
