BAGUIO CITY – Sumangsango iti kaso a panaglabsing iti Revised Forestry Code of the Philippines ti dua nga indibidual kalpasan a nakemmeg dagitoy gapu iti iligal a panangibiaheda kadagiti napukan a kayo sadiay Gurel, Poblacion, Bokod, Benguet idi kalman.
Nabigbig ti driver ti van a ni Saigy Lovie Pecban, 25-anyos a residente ti Poblacion, Kabugao, Apayao ken ti kaduana a ni Jerome Corpus Dela Cruz, 27-anyos.
Sigun kenni PSI Vicente Tamid-ay, hepe ti Bokod PNP, manarimaan ti Comelec checkpoint dagitoy iti nasao a lugar idi pinarada ti maysa a puraw a hi-ace van nga addaan iti temporary plate a VC 7909.
Ditoy a nakitada dagiti naputed a narra a naikarga iti nasao a van.
Naiturong ti lugan ken dagiti nasao nga indibidual iti Bokod PNP para iti dokumentasyon ken panakaiproseso dagitoy.
