BAGUIO CITY – Nakemmeg ti dua a lalaki gapu iti panangtakawda iti nginginaen a selpon ti maysa a turista iti deppaar ti biking area ti Burnham Park, siudad ti Baguio idi agsapa kalman.
Nabigbig dagitoy a da Cesar Dusalen Cutit, 30-anyos, baro ken residente ti West Quirino Hill, Baguio City ken ni Jay-ar Udiong Mittay, 26-anyos, baro ken residente ti Purok 3, Dontogan, Greenvalley, Baguio City bayat a nabigbig ti biktima a ni Cathriena Francisco Gallardo, 23-anyos, balasang, admin head ken residente ti Gulod St., San Vicente, Sta. Maria, Bulacan.
Maibasar iti report, agpaspasyar ti biktima ken dagiti kakaduana sadiay Burnham Park idi inruarna ti selponna manipud iti sling bag-na sakbay a nagkita iti nangibasuraanna iti basurana.
Bayat ti panagbirukna iti basuraan, insublina ti selponna iti sling bag-na ngem sadiay a nariknana a naggaraw ti bag-na ken idi kitanna ket nakalukaten ken mapukpukawen ti nasao a selpon.
Nakita ti biktima nga iggem ti maysa kadagiti suspek ti selponna ken impasana daytoy iti maysa pay a suspek isut gapuna a sinurotda dagitoy ngem nakalibas dagiti dua a suspek isut gapuna a nagreportda iti pulisya.
Immakar ti biktima ken dagiti kakaduana sadiay Mines View Park ngem sadiay a nakitada ti dua a suspek isut gapuna a kiniddawda ti tulong ti parking attendant a nangkemmeg kadagiti dua.
Naipaima dagitoy iti Mines View Barangay Hall ken iti panakakapkap dagitoy dua ket narekober ti selpon ti biktima nga aggatad iti P16,000 manipud kenni Cutit.
