BAGUIO CITY — Nadangran ti dua nga indibidual kalpasan a nakuryente dagitoy iti nagsina nga insidente iti probinsia ti Benguet ken siudad ti Baguio.
Immuna a nakuryente sadiay Amgaleygey, Buguias Benguet idi kanikadua ni Kimjay Lesino Atting, 23-anyos, baro, mannalon ken residente ti nasao a lugar.
Maibasar iti report, nakaiggem ti biktima iti payong bayat a magmagna iti barangay road.
Nupay kasta, killaat a nakuryente daytoy iti idi adda iti sirok ti live wire a kable ti kuryente a nakamuntar iti nasao a kalsada.
Dagus a naiturong daytoy iti pagagasan ken naamuan a nagsagrap ti uram iti kanawan a saka ken fracture iti kanawan a takiag nupay addan iti natalged a kondisyon.
Kabayatanna, nakuryente metlaeng sadiay Purok 2, Dontogan, Baguio City idi malem kalman ni Eduardo Jolen Sobremonte Jr., 30-anyos, chef ken residente iti nasao a lugar.
Maibasar iti report, magmagna ti biktima paturong iti balay ti pagayamna sadiay Foggy hill, Dontogan idi nasagid daytoy ti live primary line ti kuryente a naputed gapu iti napigsa nga angin.
Dagus a naiturong ti biktima iti pagagasan paras iti panakataming daytoy.
