BAGUIO CITY – Nakemmeg ti maysa a baro kalpasan a naiserbi ti warrant of arrest daytoy sadiay Kilometer 5, Pico, La Trinidad idi kalman.
Nabigbig daytoy a ni Jimson Bugtong Akin, 28-anyos ken residente ti Kilometer 24, Atok, Benguet.
Impaulog ni Presiding Judge Marietta Brawner-Cualing ti Regional Trial Court – Branch 9, First Judicial Region, Benguet Province ti warrant of arrest ni Akin gapu iti kasona a panagrames nga awanan ti piyansa.
Naamuan a ni Akin ti maikapat a Top Most Wanted Person ti Benguet PNP iti maikatlo a kwarter ti agdama a tawen iti Provincial Level.
Kabayatanna, nakemmeg metlaeng ti maysa a mannalon kalpasan a naiserbi ti warrant of arrest daytoy sadiay Pula, Asipulo, Ifugao idi kalman.
Nabigbig daytoy a ni Michael Kitong Pumihic, 39-anyos ken residente ti Antipolo, Asipulo, Ifugao.
Impaulog ni Presiding Judge Romeo Habbiling ti Regional Trial Court – Branch 14, 2nd Judicial Region, Lagawe, Ifugao ti warrant of arrest ni Pumihic gapu iti lima a bilang ti kaso a panagrames nga awanan ti piyansa.
