BAGUIO CITY — Pimmusay ti dua a minero kalpasan a napupok dagitoy iti uneg ti pagtatrabahuanda nga usok sadiay Ud-uddan, Ampucao, Itogon, Benguet idi kalman.
Nabigbig dagitoy a da Fernando Anayasan, 24-anyos, tubo ti Bauko, Mt. Province ken ni Marlo Dizon, 32-anyos ken residente ti Tuba, Benguet.
Sigun kenni PCI Eugene Raymundo, Chief of Police ti Itogon Municipal Police Station, alas nuebe idi kalman idi simrek iti usok dagiti dua a minero ken saandan a nakaruar iti pangaldaw.
Gapu iti daytoy, sinapsapol dagiti kakadwada a minero dagiti dua agingga a nasarakanda a nakasadasay dagitoy iti uneg ti usok.
Naitaray pay iti pagagasan da Anayasan ken Dizon ngem maideklara a pimmusayen dagitoy.
Mainaig iti daytoy, nainget nga ipalpalagip ti lokal a gobyerno ken ti pulisya ti Itogon ti panagannad dagiti minero iti iseserrekda kadagiti usokda nangruna ita a panagtutudo.
Kinuna ni PCI Raymundo a nasken nga ipangag dagiti small scale miners ti pakdaar ti lokal a gobyerno iti temporaryo a panakasuspindir ti mining activities tapnu malapdan dagiti insidente kas iti gas poisoning.
