BAGUIO CITY – Agkasapulan iti mannalon manipud probinsya ti Benguet ti duwa a munisipyo ti pagilian a Japan para iti Young Farmers Exchange Program – Technical Intern Training Program dagitoy.
Agkasapulan ti Kochi Prefecture, Japan iti duwapulo ket duwa nga indibidual para iti nasao a programa.
Iti nasao a bilang, kasapulanda ti duwapulo a lalaki ken duwa a babbai.
Naituding ti final interview dagitoy inton December 2017 ken maipatulodda iti nasao a pagilian inton August 2018 ken January 2019.
Kabayatanna, iti met munisipyo ti Nagano Prefecture, Japan ket agkasapulanda iti sangapulo nga indibidual a mannalon pakairamanan ti walo a lallaki ken dua a babbai.
Naituding ti final interview dagitoy inton July 2017 ken ti dispatch dagitoy ket inton March 2018.
Karaman kadagiti requirements ti panagbalin nga aktibo a mannalon ken dua a tawen a kapadasan iti panagtalon; high school graduate wenno college graduate a nakaturpos iti agriculture-related a kurso; agtawen iti 20 agingga 30; kadagiti babbai ket kasapulan a single ken saan a mabalin ti single mom.
Kasapulan a botante met laeng dagitoy ti barangay wenno munisipyo ken kabaelanna mangged sadiay Japan iti tallo a tawen.
[Para kadagiti saludsod, agturong laeng kadagiti barangay wenno iti munisipyo nga ayanyo.]