Mapukpukaw paylaeng ti dua nga indibidual gapu iti Tropical Storm Crising a nangitunda iti napigsa a panagbayakabak ti tudo, layus ken panagbakwit dagiti rinnibu tattao iti pagilian a Pilipinas.
Sigun iti National Disaster Risk Reduction and Management Council (NDRRMC), 26 a lugar ti nalayus iti pagilian a pakairamanan ti Region 1, tallo idiay Mimaropa, dua iti Region 6, ken 19 iti Region 7.
Mainaig iti dayta, dumanon iti 96,791 nga indibidual wenno 37, 598 a pamilya kadagiti 417 a barangay ti naapektaran iti Crising.
Innayon ti National Disaster Risk Reduction and Management Council (NDRRMC) a 3, 556 a pamilya wenno 11, 689 nga indibidual ti agtaltalinaed kadagiti evacuation centers bayat a 1,781 a pamilya wenno 6, 012 nga indibidual ti agtaltalinaed kadagiti dadduma a natalged a lugar.
Kabayatanna, tallo nga indibidual ti naireport a mapukpukaw a kompirmaren paylaeng ti NDRRMC.
