BAGUIO CITY – Nakemmeg ti dua nga indibidual kalpasan a naaktuwan ti panaggatang dagitoy iti maatap nga iligal a droga iti nagbeddengan ti Mapaoay – Nambaran, Tabuk City, Kalinga idi agsapa kalman.
Nabigbig dagitoy a da Allan Lopez Dumog, 40-anyos, residente ti Junction, Pinukpuk, Kalinga ken John Paul Lumiwan Quibuhan, 18-anyos, residente ti Manag, Conner, Apayao.
Maibasar iti report ti Kalinga Police, nakaawat dagiti personnel ti Tabuk City Police Station iti tawag manipud kadagiti barangay officials ti Nambaran seknan iti maatap a panaggatang dagiti saan pay a nabigbig nga indibidual iti iligal a droga manipud kadagiti maatap a drug pushers iti nasao a lugar.
Dagus a nagresponde dagiti pulis a nagresulta iti panakakemmeg da Dumog ken Quibuhan.
Nakumpiskar kenni Dumog ti maysa a pekete ti maatap a shabu ken ti maysa a motorsiklo bayat a nakumpiskar kenni Quibuhan ti maysa a pakete ti maatap a shabu.
Agarup nasurok iti 0.03 grams ti kadagsen dagiti nakumpiskar a banag.
Sumangsango metten dagiti dua iti kaso a panaglabsing iti RA 9165 wenno ti Comprehensive Dangerous Drugs Act of 2002.
