Dua nga ubbing a lalaki ti ay-aywanan ita iti City Social Welfare and Development Office (CSWDO) kalpasan a nasarakan a matmaturog iti uneg iti Baguio City Public Market, kasaruno iti maysa a viral video iti social media.
Sigun iti Public Order and Safety Division (POSD), dagosda a sinapul dagiti ubbing kalpasan a nakaawat iti report seknan iti video.
Iti partikular nga oras, nasarakan ti dua nga ubing, agtawen iti 10 ken 13, a matmaturog iti rabaw iti karton iti sanguanan iti maysa a puesto iti palengke.
Iti inisial nga imbestigasion, kinuna dagiti ubbing nga iti palengkeda a matmaturog gaputa addayo ti pagtaenganda.
Inaklonda metlaeng nga agpadada a saanen a sumsumrek iti pagadalan.
Kalpasan ti dokumentasyon, naipasidong ti dua a menor de edad iti panangaywan iti City Social Welfare and Development Office para iti kaskenan nga assessment, case management, ken dadduma pay a child welfare intervention.