BAGUIO CITY – Pimmusay ti dua nga indibidual bayat a nadangran ti 10 a dadduma pay iti panaka-aksidente ti maysa a forward truck sadiay Upper Maton, Pudtol, Apayao idi malem kalman.
Maibasar iti report, pasalog iti kalsada ti truck nga addaan plaka a DKA 300 nga imanmaneho ni Gerald Donayre Bonifacio, 26-anyos ken residente ti Lucban, Abulug, Cagayan.
Naamuan a naglaon daytoy ti excavator ken paturong sadiay Poblacion, Pudtol, Apayao.
Nupay kasta, napukawan ti preno ti nasao a trak isut gapuna a napukaw met ti driver ti kontrolna iti manibela agingga a naidungpar ti lugan iti waiting shed.
Dinalapos pay ti trak ti grupo dagiti tattao nga agmermeryenda iti sirok ti maysa a kayo sakbay a naidungpar iti maysa a balay.
Dagus met a nagresponde dagiti pulis, bombero ken maseknan nga umili ken intarayda dagiti biktima iti pagagasan.
Nupay kasta, naideklara a dead on arrival iti pagagasan dagiti biktima a da Jamela Alawin Ibaya, 5-anyos ken Valentina Barad Alawin, 34-anyos.
Sigun iti pulisya, naiturong iti kustodiyada ti driver ti truck a ni Bonifacio kalpasan a nataming iti pagagasan.
Iti agdama ket matamtaming paylaeng iti pagagasan dagiti siyam a dadduma pay a nadangran.
Dagiti pasahero ti truck a nadangran:
- Larry Dicierto Canturna, 50-anyos, residente ti Zitanga, Ballesteros, Cagayan
- Fernando Alicuben Alvarez, 22-anyos, excavator operator, residente ti Dugo, Camalanuigan, Cagayan
- Rolando Conanan Pascual, 58-anyos, excavator helper, residente ti Sta. Cruz, Ballesteros, Cagayan
Dagiti bystanders a nadangran:
- Luz Barad Gudayan, 52-anyos, residente ti residente ti Swan, Pudtol, Apayao
- Izel Gudayan Budoc, 31-anyos, residente ti Swan, Pudtol, Apayao
- Jake Cyrus Alawin Ibaya, 4-anyos
- Catherine Emiliano Barad, 31-anyos
- Mercy Barad Alawin, 72-anyos
- Xander Alawin Angngac, 2-anyos
- Geron Donayre Bonifacio, 29-anyos, residente ti Emiliana, Sta. Marcela, Apayao
Nupay manarimaan ti kanayonan nga imbestigasyon iti kaso, manamnama a sumango ti driver iti kaso a Reckless Imprudence Resulting in Double Homicide, Multiple Physical Injuries and Damage to Property.
