BAGUIO CITY – Pimmusay ti dua nga indibidual bayat a nadangran ti tallo a dadduma pay a bin-ig a taga Hapao, Hungduan, Ifugao kalpasan a natnag ti naglugananda nga ambulansiya ti Hungduan Municipal Hospital sadiay Ba-ey, Doddo, Talubin, Bontoc Mountain Province idi agsapa kalman.
Maibasar iti report ti Bontoc Municipal Disaster Risk Reduction and Management Office, nagtaud ti ambulansiya a naglaon ti lima a pasahero sadiay Luis Hora Regional Memorial Hospital ken pasubli sadiay Hungduan, Ifugao.
Kabayatan ti panagdalyasatda iti kalsada ket natnag iti rangkis.
Indeklara ni Bontoc Municipal Health Officer Dr. Diga Gomez a pimmusay iti nakatnagan ti ambulansiya da Earole Kurt Akiate, 21-anyos ken Franklin Angawa, 37-anyos, driver ti ambulansiya.
Naitaray ken matamtaming iti ospital da Rexton Abluyen Duyapat, 20-anyos; Nelda Joy Angawa Tapyugon, 23-anyos, social worker Hungduan Municipal Hospital ken ni Anabelle Attang, 32-anyos, nursing attendant ti Hungduan Municipal Hospital.
Nangisayangkat met iti cleansing ritual dagiti maseknan nga umili ken opisyal ti Mountain Province kalpasan ti napasamak nga aksidente.
