BAGUIO CITY – Impaayen ti National Council for Indigenous Peoples (NCIP) – Cordillera ti Certificate of Affirmation ni Roger Sinot para iti panagbalinna kas Indigenous People’s Mandatory Representative (IPMR) ti siudad ti Baguio.
Iti panakiyuman ti Bombo Radyo kenni Sinot, kinunana a manipud iti NCIP-Cordillera ket naisumitir ti nasao a sertipikasyon iti Department of the Interior and Local Government (DILG)-Cordillera para iti panangipaayda met iti Certificate of Recognition.
Kinunana a kalpasanna met maisumitir ti dua a sertipikasyon iti DILG-Baguio City sakbay a maiwaras iti opisina ti mayor, ti bise mayor ken dagiti konsehal.
Innayonna a masapul nga agsapata pay daytoy sakbay a makatugaw kas konsehal ti siudad wenno kas regular a miembro ti lokal a konseho.
Naamuan a nagsapatan daytoy kas IPMR ti Baguio City iti sangwanan dagiti miembro ti Cordillera Elders Alliance a paset ti customary practice dagiti Cordillerans.
Inkarina met nga ipangrunana ti pagsayaatan dagiti Indigenous Peoples ken Indigenous Cultural Communities iti lokalidad iti kanito nga agtugawen daytoy iti City Council.
Kinunana a tutukanna pay ti panakaireporma ti Committee on Indigenous People and Cultural Communities iti City Council ken agipasa pay daytoy kadagiti resolusyon wenno ordinansa a mangital-o iti political, civil, economic ken cultural rights dagiti IPs ken ICCs iti lokalidad.
Ipangrunana pay ti accounting dagiti nainsigudan nga umili iti siudad tapnu maamuan ti pakabuklan a bilang dagitoy ken adda ti mabukel a datus a pagbasaran met dagiti IPs iti panangpilida iti sumarsaruno nga IPMRs ti siudad.
Tartarigagayanna pay nga iti panagtugawna kas IPMR ti Baguio City ket agmaymaysan dagiti amin a nainsigudan nga umili ditoy lokalidad.
Kabayatanna, kinuna met ni Vice Mayor Edison Bilog nga akseptaren ti City Council ni Sinot.
Innayonna a ti laeng makalapped iti panagtugaw ni Sinot kas IPMR ti siudad ket no adda ti pammilin manipud iti korte.
Dinakamatna a posible nga inton Lunes ket makatugawan ni Sinot iti nasao a posisyon.
Nupay kasta, inaklon ti bise mayor a parikut ti pag-opisinaan ni Sinot ken awan pay ti pondo a nailatang para iti sweldo daytoy ken dagiti agbalin nga staff ti opisinana ken ti maaramat iti panakagatang dagiti kasapulan iti maysa nga opisina.
Iti baet daytoy, inkarina a nakasagana a tumulong ti opisinana iti panakaipaay dagiti pagkasapulan ti agbalin nga IPMR ti siudad iti kanito nga agtugawen daytoy.
