BAGUIO CITY – Agtultuloy ti hot pursuit operation ti militar kadagiti naglibas a rebelde a nakarinnupak dagitoy sadiay Jones, Isabela idi kalman a nagresulta iti ipupusay ti dua a soldado ken panakadangran ti uppat a dadduma pay.
Binigbig ni Captain Jefferson Somera, spokesperson ti 5th Infantry Division, Philippine Army dagiti pimmusay a da Sgt. Magno Bagioan manipud Abra ken ni PFC Romeo Mayos manipud iti Mt. Province.
Nabigbig met dagiti nadangran a da 1Lt. Joshua Barrio, Sgt. Arnold Mangawit, PFC Gilbert Pablo ken PFC Novel Maramag.
Naamuan a nagturong dagiti soldado sadiay Dicamay Dos, Jones, Isabela tapnu agresponde iti naireklamo nga extortion activities dagiti rebelde sadiay.
Nupay kasta, killaat a pinaputukan dagiti komunista ti tropa ti gobyerno a nagresulta iti rinnupak agingga a nagsanod dagiti rebelde.
Sigun kenni Capt. Somera, naituding a maiyawiden iti pagtaenganda ti bangkay dagiti dua a soldado manipud Cordillera.
