BAGUIO CITY – Simmuko iti pulisya ti dua a suspek a pakairamanan ti maysa a menor de edad a nangbagsol ken nangpapatay iti ulitegda sadiay Eastern Hill Subdivision, Baguio City idi napalabas a lawas.
Nabigbig dagitoy a da Daniel Pidero, 19-anyos ken ti menor de edad ket 17-anyos bayat a biktima ket nabigbig a ni Reynaldo Ballesteros Pascua, 48-anyos, maysa a foreman ken tubo ti Pangasinan.
Iti panakipatang ti Bombo Radyo kenni PCI Gil Imado, commander ti BCPO – Station 2, kinunana a simmuko dagiti dua a suspek iti Uminggan Police Station sadiay Pangasinan idi agsapa kalman.
Kinunana a kalpasan a nakaawatda ti tawag manipud iti nasao a kuerpo ti pulisya ket imbilin ni City Director PSSupt. Ramil Saculles ti dagus a panangsukonda kadagiti suspek. VC IMADO
Kabayatanna, iti met panakiuman ti Bombo Radyo kenni Pidero, kinunana a saanna a ninamnama a mabagsol ti ulitegna ken kalpasan ti insidente ket dagusda a naglibas ken nagdiretso sadiay Uminggan, Pangasinan.
Inaklonna nga agbabbabawi daytoy iti inaramidda ngem ti nangbagsol a mismo iti biktima ket ti kasinsinna a menor de edad.
Insalaysayna a nakapungtot ti ulitegda gapu iti panagsigarilyoda iti sangwanan daytoy ken binagaanna dagitoy nga agbakasyonda pay laeng.
Inaklonna a dinanog daytoy ti ulitegda ken dua kadagiti kakadua daytoy ti nanglinged kenkuana agingga a timmulong ti kasinsinna a nangala ti kutsilyo ken ditoy a binagsol ti binatilyo ti uliteg dagitoy.
Naamuan nga agtatrabaho dagitoy iti sidong ti biktima.
