Mangnamnama ni 2-time Olympic gold medalist Carlos Yulo nga umado pay ti bilang dagiti gymnasts iti pagilian a Pilipinas.
Impeksa ti 24-anyos a gymnast a sapay koma ta agserbi nga inspirasyon kadagiti henerasyon ti pananggun-odna iti balitok a medalya iti men’s floor exercise ken men’s vault events ti Paris Olympics tapno padasenda met a sumrek iti gymnastic.
Malaksid kenni Carlos Yulo, sumagmamano metlaeng nga agtutubo ti nangipakitan iti abilidad dagitoy iti nagduduma nga international competition kas iti 2023 Southeast Asian Games a nakaalaan ti pagilian iti tallo a gold medals ken dua a silver medals.
Nagun-od ni Ivan Cruz, 21-anyos, kabagyan ni Yulo ti balitok a medalya iti Southeast Asian Games a naangay idiay Cambodia idi napan a tawen bayat a nakaala metlaeng iti medalya ni gymnast Juancho Miguel Besana iti vault event.
Malaksid kadakuada, agrugrugi metten nga agaramid iti naganda iti tay-ak ti gymnastic dagiti kabsat ni Carlos Yulo a da Eldrew ken Elaiza.
Limmaban ni Eldrew iti 2023 Palarong Pambansa nu sadino nakaibulsa daytoy iti innem a gold medal bayat a ni Elaiza ket nakaiyawid metlaeng iti lima a gold medals iti kaleppas a 2024 edition ti Palarong Pambansa idiay Cebu City.