BAGUIO CITY – Inuram dagiti mapapati a kameng ti New Peoples Army (NPA) ti dua a truck ti Philex Mining Corporation sadiay Tapac, Ampucao, Itogon, Benguet itay agsapa.
Kinumpirma ti 503rd Infantry Brigade ti nasao a pananguram, ken iti agdama ket mangisaysayangkatda iti hot pursuit operation kadagiti responsable iti nasao nga insidente.
Kinuna met ni Itogon Mayor Victorio Palangdan a dagus a nagresponde iti uram dagiti kameng ti Bureau of Fire Protection ken ti Itogon Municipal Police Station.
Immunan a nakaawat iti mensahe ti mayor mainaig iti panangisayangkat iti checkpoint dagiti maatap a kameng ti rebelde a grupo iti nadakamat a lugar isut gapuna a dagus a nagresponde dagiti pulis ken soldado.
Nakaawat met ti Bombo Radyo Baguio iti mensahe manipud kadagiti nagpabigbig a kameng ti NPA ken kinunada a pinuoranda ti truck ti nasao a kompanya.
Ginandat met ti Bombo Radyo nga awagan ti numero ngem saanen daytoy a makontak.
