BAGUIO CITY – Ipalpalagip manen ti pulisya ti kanayon a panagannad dagiti drivers kabayatan ti panagmanehoda ken ti panangipasiguradoda a kanayon a nakakondisyon ti lugan ken bagi dagitoy sakbayda nga agbiahe tapnu maliklikan ti panaka-aksidenteda iti kalsada.
Kasaruno daytoy ti panakailista ti nagsaruno ken nagsina nga aksidente iti kalsada a nakairamanan ti dua a lugan, partikular sadiay Tublay ken Mankayan iti probinsia ti Benguet.
Immuna a nailista ti panaka-aksidente ti maysa a mini dump truck sadiay Golon, Ambassador, Tublay a nakatayan ti maysa a baro.
Maibasar iti report, sumangsang-at ti nasao a trak iti kalsada idi naiddep ti makina a rason tapnu dumsaag dagiti tallo a pasahero ken idurunda daytoy.
Nupay kasta, napukaw ti driver ti kontrol iti preno a nangitunda iti panagatrasna ken iti panakairaman ti biktima a naideklara a dead on arrival iti pagagasan.
Kabayatanna, nabaliktad met ti maysa a pajero sadiay Ambabag, Mankayan kalpasan a saan a makontrol ti driver ti manibela ti lugan a nangitunda tapnu maidungpar iti kongkreto nga alad ti kalsada ken iti panakatumbag daytoy.
