BAGUIO CITY–Nakemmeg ti maysa a wanted person babaen iti bileg ti warrant of arrest nga inserbi dagiti otoridad sadiay Camdas Rd. ditoy siudad ti Baguio itay nabiit.
Nabigbig daytoy a ni Mark Ian Galma Ganitano, 42-anyos, adaan asawa ken residente ti Uppper Pinget, La Trinidad, Benguet.
Naamuan a nailista ti nakemmeg nga indibidual a Top 5 Most wanted person iti provincial level iti maikatlo a kwarter ti agdama a tawen.
Sumangsango met itan iti kaso a panaglabsing iti RA 9165 wenno Comprehensive Dangerous Drugs Act of 2002 ti nasao nga indibidual.
Kabayatana,
Sumangsango iti kaso a rape thru sexual assault ti maibilbilang a maikadua a Top Most wanted person ti Baguio City Police Office Station 3 kalpasan a nakemmeg sadiay Doclae Village Tiptop, Pacdal Road, Baguio City itay nabiit.
Nabigbig daytoy a ni FERNANDO BUCAO ESPIRITU JR., 31-anyos, baro, tubo ti Damortis, La Union, ken residente iti nadakamat a lugar.
Nakemmeg ti suspek babaen iti bileg ti warrant of arrest nga impaulog ti korte ditoy siudad ken inserbi ti nagtipon a puwersa iti BCPO Station 3, Station 10 ken daduma pay a maseknan a unit ti pulisya.
Nairekomendaran daytoy iti P200,000 a piyansa para iti temporaryo a panakawayawayana.
Naiturongen ti suspek iti kustodiya ti pulisya para ti umno a disposisyon iti kaso.
