BAGUIO CITY – Impannakel ken pinadayawan ti Dean ti College of Law ti Cordillera Career Development College dagiti 20 nga estudyanteda a nakapasa iti 2016 Bar exam manipud kadagiti 59 a nakipaset iti nasao nga eksaminasyon.
Sigun kenni CCDC College of Law Dean Atty. Miller Quintin, daytoy ti kaunaan a gundaway a dakkel ti bilang dagiti pimmasa manipud iti pagadalan dagitoy.
Kinunana a ditoy a pinaneknekan ti pagadalanda a kabaelan dagitoy ti makikompetensia kadagiti dadduma a pagadalan a mangididiaya iti Bachelor of Laws ditoy lokalidad.
Inaklonna nga adda ti gundaway a naballaagan ti CCDC a maipasardeng ti College of Law gaputa adda dagiti tawen nga awan ti nakapasa kadagiti estudyanteda.
Sigun kenkuana, napaneknekan a kabaelan met dagitoy a mangpataud kadagiti estudyante nga agbalinto nga abogado iti pagilian iti baet nga ubing paylaeng ti College af Law sadiay.
Dinakamatna a dagiti propesor sadiay ket judges, retired judge ken prosecutors karaman dagiti dadduma a practicing lawyers.
Kinablaawanna pay dagiti baro nga abogado manipud iti pagadalanda a da Atty. Victor Singa Jr., Manuel Bacduyan, Jessica Balawis, Priel Balnao, Juvily Bandiwan, Grail Brioso, Melanie Bumacas, Chester Cayabas, Richard Dumapis, Reynaldo Gaano, Steve Gondales, Imelda Guidangen, Jeeka Kimmayong, MJ Maguen, Rhea Maguilaw, Darwin Marcos, Marcile Merino, Corazon Ocharon, Richard Piaga ken ni Swettle Tamang.
