BAGUIO CITY – Inladawan ni 2019 SEA Games sambo gold medalist Mark Striegl a naidumduma a kapadasan, espesyal ken dakkel a dayaw ti opisyal a panangibagina iti Pilipinas iti maysa kadagiti events iti agtultuloy a 2019 SEA Games a maisaysayangkat ditoy pagilian.
Iti eksklusibo a panakipatang ti Bombo Radyo, imbingayna ti dimmalananna manipud iti kina-mix martial arts (MMA) fighter-na agingga iti panagbalinna a kameng ti national sambo team ti Pilipinas.
Kinunana a naipasidong daytoy iti uppat a bulan a nainget a panagsanay iti sambo a Russian combat sport iti sidong ni head coach Jerry Legaspi a nang-recuit kenkuana.
Dinakamat ni Striegl a nagbalin a naannayas ti panagsanayna iti sambo ngem naaddaan daytoy iti sinusitis idi pay napalabas a lawas isut gapuna nga agtumtumar iti antibiotics agingga iti nagbalin a labanna idi rabii.
Nupay kasta, kinunana a maysa laeng ti panagsakitna kadagiti nasken a daeranna isut gapuna nga inaramidna ti amin a kabaelanna tapnu naipangabakna ti labanna kontra iti atleta ti Singapore iti men’s sambo 74-kg category.
Inaklon ti Fil-AM elite-level grappler a narigatan daytoy iti panag-adjust-na iti sambo manipud iti panagbalinna a professional MMA fighter gaputa iti sambo ket adda ti uniporme a saanna a narwaman iti MMA.
Dinakamatna a naabak isuna iti kaunaan a labanna iti sambo sadiay South Korea isut gapuna nga ad-adda pay nga inirtenganna ti panagsanayna iti nasao a combative sport.
Mangnamnama pay ti sambo gold medalist a mapaggiddanna ti panagay-ayamna iti sambo ken ti panagsublina iti professional MMA gaputa makatulong ti sambo iti panakapasayaat pay ti istratehiyana iti MMA nangruna iti judo.
Iggem ti 31-anyos a ni Striegl ti professional record nga 18 wins ken 2 losses ken limmablaban daytoy iti PXC ken ONE Championship ken iti agdama ket daytoy ti agdama a URCC Featherweight Champion.
