Nagsapatan dagiti nasurok lima ribo a 2025 Bar Exam passers idi kalman.
Naangay ti oath taking ceremony ken ti signing of the Roll of Attorneys dagiti 5,594 a baro nga abogado iti Philippine Arena idiay Bocaue, Bulacan.
Iti mensahe ni Bar Exams Chairperson Amy Lazaro-Javier, kinuna daytoy a ti kaadda dagiti 2025 Bar Exam passers iti nasao a seremonya ket maysa a testimonya a ti banag nga arigana saan a magun-od ket mabalin a mapagballigian.
Kagiddan dayta,impettengna ti kinapateg ti panagtalinaed a napakumbaba.
Kabayatanna,kinuna ti nasao nga associate justice a 22 nga indibidwal ti saan a nakapagsapata iti nasao a seremonya.
Maipalagip a manipod iti 11, 420 a nagpaisidong iti 2025 Bar Examinations ket pakabuklan a 5,594 dagiti nakapasa nu sadino, ni Jhenroniel Rhey Timola Sanchez manipod iti University of the Philippines (UP) ti nakaala iti umuna a pwesto dagiti topnotcher.
