Generally peaceful ti naipatungpal a parada idiay Tabuk City, Kalinga para iti Bodong Festival.
Iti pannakiuman iti Bombo Radyo kenni PLTCOL. Benson Macli-ing, Chief of Police ti Tabuk City Police Station kinunana a napintas ti resulta dagiti naisayangkat a parada idi February 11 ken February 14 iti agdama a tawen.
Sigun pay iti nasao nga opisial, napintas ti kasasaad ti pannawen kabayatan dagiti parada.
Nupay kasta, napasaran dagitoy ti panagbayakabak ti tudo kabayatan ti Street parade idi February 13, isu’t gapuna a nabasa dagiti sumagmamano a performers.
Iti baet dayta, impetteng ni Macli-ing nga adu latta dagiti bisita a dimmar-ay iti nasao a piesta.
Kabayatanna, impaganetget ni Maclin-ing nga awan ti nagbalin a parikut dagitoy seknan iti gunay ti trapiko gapu kadagiti alternative route a naipaay para kadagiti motorista.
Mainaig iti dayta, kinuna ni Macli-ing nga awan ti nailista dagitoy nga insidente iti panagtakaw.
Impeksa ti nasao nga opisyal a balligi ti operasion babaen iti panagtitinnulong dagiti operatiba iti Tabuk City kasta met dagiti nagapu kadagiti nagduduma a Munisipio iti nasao a Probinsia.//mp4
