Naitantan ti panakaangay iti prestihioso nga Oscars nomination wenno ti Academy Awards kagiddan ti agtultuloy a panagramaram iti uram idiay Los Angeles, California.
Iti maikatlo a gundaway, naitantan daytoy inton January 23 manipod iti immunan a delayna a January 19 ken iti orihinal nga iksedyulna a January 17.
Malaksid iti dayta, nakanselar metlaeng iti Oscars nominees luncheon kasta metten ti Scientific and Technical Awards a nakareschedule iti saan pay nadakamat a petsa.
Sigun iti akademya, napateg ti panangitantanda kadagiti sumagmamano nga aktibidad a naituding a maipatungpal kas panakipagrikna kadagiti naapektaran iti uram saan laeng a dagiti celebrities nu di ket uray dagiti daduma pay.
Malaksid iti Oscars, naitantan metlaeng ti Critics Choice Award, ken ti Tea Party iti British Academy of Film and Television Arts.
Temporaryo metlaeng a naipasardeng dagiti sumagmamano a television shows ken panakaaramid dagiti sumagmamano a pelikula.//Rob
