Inladawan ni Senate President Vicente “Tito” Sotto III a ti 2026 National Budget ti kadalusan kadagiti amin a budget iti pagilian kalpasan nga in-veto ni President Ferdinand Marcos Jr. ti agarop ₱92.5 billion a gatad dagiti proyekto iti sidong dagiti unprogrammed appropriations (UA).
Patien ni Senator Tito Sotto a kusto ti tignay ti presidente iti panag-veto daytoy iti nasao a balor ti unprogrammed appropriation.
Impeksa met ni Senate Finance Committee Vice Chairperson Senator Erwin Tulfo a ti 2026 budget ket ti “most transparent budget law” iti pakasaritaan nu sadino, impettengna a daytoy ti kasapulan tapno maisubli ti talek ti publiko wenno dagiti umili iti gobyerno iti pagilian.
Kagiddan dayta, pinagyamanan metlaeng ni Senator Tulfo ti presidente iti pananglimitar daytoy kadagiti naaprubaran nga unprogrammed funds nu sadino, patien ti senador a mabalin nga agserbi daytoy a maysa nga addaang para iti panakagun-od ti pudno nga accountability.
Kagiddan dayta, impanamnama daytoy ti panangmonitorda iti panakaiyimplimintar dagiti amin proyekto tapno masigurado nga awan dagiti saan a malpas ken dagiti substandard.
Mainaig iti dayta, pinagyamanan met ni Senator Bam Aquino ti panakapirma ti ₱1.34 trillion a pondo para iti sektor iti edukasyon nu sadino, maaramat daytoy tapno maipatungpal dagiti napapateg a banbanag para iti pagdur-asan ken pagsayaatan ti nasao a sektor.
