Kinanselar dagiti maseknan nga opisyales ti nalatak a Japanese cherry blossom festival ita a tawen gapu iti maatap a kumarkaro a kaso dagiti awanan disiplina a turista ken lokal a sangaili a makaap-apektar iti komunidad.
Sigun iti opisyal ti Fujiyoshida City, Japan, saanda nga ituloy ti nasao a pasken a tinawen a maipatpatuntgpal asideg iti nalatak a Mount Fuji gapu kadagiti nasaknap a panaggugulo iti nasao a siudad.
Karaman kadagiti mapaspasamak nga insidente ti trespassing wenno panagserrek kadagiti pagtaengan nga awanan ti pammalubos dagiti bumalay nu sadino, adda pay dagiti gundaway a makiapa dagiti nagbasol nu mababalaw dagitoy iti aramidda.
Maipalagip a nainsigudanen a tinawen a maramrambakan ti cherry blossom festival nu sadino, tampok iti daytoy dagiti cherry blossom wenno Sakura kasta metten a maipabpabuya dagiti nagduduma a presentasyon ken luto dagiti Hapon a daydaywen dagiti rinibribu a turista.
