Saan a ninamnama ti 21-anyos nga agballigi ken magun-od ti korona iti kaleppas a Mr. and Ms. CARASUC 2024 a naangay sadiay probinsia ti Apayao.
Iti exclusive interview ti Bombo Radyo Baguio kenni Henry Estacio, ti baro a Mr. Cordillera Adminstrative Region Association of State Univesities and Colleges wenno CARASUC 2024, kinunana nga adu dagiti nagtataer ken naglalaing a nakalabanna a kandidato a kas da Mr. Benguet State University, kasta met ni Mr. Abra ken Mr. Mountain Province.
Ngem nu pay kasta, saan a nagpaabak daytoy gaputa patienna nga addaan daytoy ti dedikasion a mangabak nga isut rason a nagun-odna ti balligi.
Imbinglayna nga adu dagiti pasalip a nakipasetanna a kas ti Mr. Lamut a naangay iti munisipyu dagitoy, ken ti Mr. IFSU (Ifugao State University) a naangay iti pagadalan dagitoy.
Iti pannakipasetna iti nagduduma a kompetision, aklonen ni Estacio nga adda dagiti “insecurities-na” ngem patienna a saan a daytoy dagiti rason tapno saan a makipaset ken agtuloy a makilaban.
Inlawlawagna a nakadepende ti panagballigi iti maysa a pageant babaen iti “personality” wenno kas ano a makikadua iti dadduma a kandidata, panagsungbat a nalaing iti damag, ken kasta met iti kinapintas ti kawes a maisuot.
Dagiti nangguyugoy kenkuana a makipaset iti nasao a pasalip ket dagiti instructors daytoy, kasta met dagiti paset ti pamiliana nangruna dagiti nagannakna gaputa nakitada nga adda ti dakkel a kabaelanna.
Nadakamat ti Bachelor of Arts in Bussiness Adminstration student a dakkel a tulong pinansial ti pannakipasetna iti nagduduma a pageant.
“Huwag kayong panghihinaan ng loob. Kung talo kayo ngayon, talo kayo sa susunod, at sa susunod pa, syempre ganon talaga, may natatalo pero huwag kayong matatakot. Kase para sa akin, it is either you win or you learned”, kinuna idi nadamag daytoy nu anya ti mensahena kadagiti indibidual a sumrek iti pageantry.
Pinagyamanan met amin ni Henry dagiti simmuporta kenkuana bayat ti nasao a kompetision.
Kabayatanna, malaksid iti nasao a titulo a nagun-od ni Henry, naalana pay ti Best Performer, Best in Regional Attire, Best in Barong Tagalog, King of the Ramp ken Mr. Photogenic.
Iti agdama, pagsagsaganaan ni Henry ti manamnama a Mr. and Ms. PASUC a maipatungpal inton sumaruno a tawen.
