Benguet- Natiliw ti maysa a babai kalpasan a ginandatna nga agala iti police clearance iti istasyon ti pulisya idiay La Trinidad, Benguet idi kalman, Nobyembre 11.
Ti suspek ket agtawen iti tallo pulo ket dua, awanan trabaho ken tubo ti Bakun, Benguet.
Maibasar iti report ti La Trinidad Municipal Police Station, nagrequest ti nasao a babai iti national police clearance, agarup alas dose ti pangaldaw ngem naduktalan iti rekordda nga addaan gayam daytoy iti kaso nga estafa.
Gapu iti daytoy, dagus nga inserbi dagiti otoridad ti warrant of arrest kontra kenkuana nga impaulog ti korte idi Enero 4 iti agdama a tawen.
Iti agdama ket iggem daytoy dagiti otoridad.
Narekomendaran met daytoy iti P36,000 a piyansa para iti temporaryo a pannakawayawayana.//Genzel Depayso
