Inwaragawag dagiti prosecutors ti International Criminal Court (ICC) nga adda kadakuada ti 2,279 nga ebidensia iti kaso kontra kenni sigud a president Rodrigo Duterte.
Karaman dagiti nasao a banag kadagiti 6,909 nga ebidensia nga imbutaktak ti prosecution team sakbay ti trial ni Duterte inton Nobiembre 2026.
Sigun iti notification manipud iti prosekusion a napetsaan iti Agosto 5, inwaragawag ti panel dagiti ebidensia sigun iti pagannurotan ti korte.
Karaman kadagiti “incriminating evidence” kontra kenni Duterte ti pammaneknek a nairanta a mangipasdek kadagiti contextual elements, modes of liability, ken dadduma pay.
Inlista metlaeng ti prosecution dagiti ebidensia mainaig iti barangay clearance operations kabayatan ti drug war ken ti Davao Death Squad.
Mangrugi ti main trial ti sigud a presidente inton Nobiembre 30, 2026.
Maipalagip a naibalud ni Duterte iti ICC gapu iti crimes against humanity mainaig iti nadara a war on drugs a nakatayan ti agarup 6,000 a tattao.
Pattapatta dagiti Human rights groups a mabalin a dumanon agingga iti 30,000 ti bilang dagiti pimmusay.