Sumangsango ti kaso a panaglabsing ti PD 1612 wenno ti Anti-Fencing Law ti lalaki nga agtawen ti 23, single, maysa a businessman, ken residente ti North Sanitary Camp, Baguio City.
Maibasar iti report ti pulisya, nadiskubre ti biktima a lalaki, 46-anyos, single, maysa a businessman ken residente idiay Bontiwey, Poblacion, Tuba, Benguet a mapukpukaw ti camera-na nga aggatad ti P30,000.
Sinapul ti complainant ti camera iti uneg ti pagtaengan ti mapapati a nangala ngem saan daytoy a nabirukan.
Sinaludsod metlaeng ti complainant ti inauna nga anak ti mapapati a nangala ngem kinunana a saanna nga ammo.
Gapu iti panagsuspetsa ti complainant, inalana ti selpon ti maysa kadagiti anakna tapno sukimaten ti naglaon ti selpon daytoy ket nakitana ti sumagmamano a pruweba a nailako ti camera iti maysa a facebook page a pagilaklakuan ti camera.
Kinontak ti complainant ti facebook page ti nangilakuan ti anakna ti camera ket napanennekan nga inlako daytoy ti anakna nga agbalor ti P1,800.
Kiniddaw ti complainant a maisubli ti camera ngem nangipaay daytoy ti kondision nga agbayad ti P4,000 ngem immannugot ti complainant.
Dagos met a nagpatulong daytoy iti pulisia ken napasamak ti diskusion iti nagbaetan ti complainant ken suspek ngem awan ti nagbanaganna.
Iti agdama, naiturongen ti reklamo iti barangay.//Bombo Genzel Depayso
