Naipila ti kaso nga alleged theft kontra iti suspek kalpasan a tinakawna ti selpon ti maysa nga estudyante sadiay La Trinidad, Benguet.
Ti nasao a suspek ket 23-anyos, maysa a lalaki, awanan iti trabaho a tubo sadiay Naguilian, La Union ken residente sadiay Pico, La Trinidad.
Maibasar iti imbestigasyon ti pulisya, ti biktima ken ti kadua daytoy ket paturong iti pagadalanda ngem kellaat a nagparang ti suspek iti likudanda ken inalana ti selpon ti biktima nga agbalor iti P10,000 pesos.
Gapu iti dayta, nagkiddaw ti biktima iti tulong ken pinadasda a kamaten ti suspek ngem saan dagitoy a nagballigi.
Kalpasan ti sumagmamano nga aldaw, naipakaamo iti biktima nga adda ti nakemmeg a suspek iti panagtakaw iti kapada a lugar.
Gapu iti dayta, nagturong ti biktima iti La Trinidad Municpal Polie Station ken positibo a binigbigna ti nasao a lalaki.
