Maragsakan ti 23-anyos ken tubo ti Tabuk City, Kalinga kalpasan a pinatgan ti Dios a makapasa ken mairaman kadagiti topnotchers ti Civil Engineers Licensure Examination 2024.
Iti exclusive interview ti Bombo Radyo Baguio kenni Engr. Carlos Brylle M. Artates, ninamnamana a makapasa daytoy iti nasao nga eksaminasion ngem aklonen a nagdudua nu karaman daytoy kadagiti topnotchers.
Naamuan ni Artates a pimmasa daytoy babaen ti panangibaga dagiti kakabsatna nu sadinno napalalo metlaeng ti ragsakda idi naamuanda ti resulta.
Imbinglay ti nasao nga indibidual a dakkel a karit kenkuana ti napasaran a COVID-19 pandemic gaputa nakagun-od daytoy ti grado a tres kadagiti nagduduma a subjects-na.
Ngem nupay kasta, saan a nagserbi daytoy tapno saanna a sayaaten ti panagadal nu diket inkagumaanna a papintasen pay ti performance-na iti pagadalan.
Nagbalin nga “eye-opener” kenkuana ti nasao a grado gaputa bigbigenna a nalaing daytoy manipod pay idi elementary ken high school daytoy.
Pinili ni Artates ti nasao a kurso gaputa sinurotna ti kabsatna ken ti kasinsinna a maysa metlaeng nga engineer.
Dagiti estratehiya nga inaramid ni Artates a rason ti pannakapasana ket ti panagbuyana iti youtube nga adda pakainaiganna ti kursona, pannakipaset iti maysa a review center ken panag-solve.
Maysa pay kadagiti ar-aramidenna ket pannakipasetna kadagiti gagayemna tapno rumuar ken makapaghang-out gaputa aklonenna a makapasadot ti panag-solve ken panagadal iti tunggal aldaw.
Para kenni Artates, “consistency” iti panagsolbar ti matematika ti maysa kadagiti tulbek tapno “ma-familiarize” ken ad-adda a makapasa iti eksaminasion.
Ti nagserbi ken agserserbi nga inspirasion ni Artates bayat ti panagadalna ket dagiti paset ti pamiliana nangruna dagiti nagannak daytoy ken kasta met ti nobyana gaputa daytoy ti nangtignay a mangiruar ti kasayaatan kenkuana.
Kabayatanna, pinagyaman ti nasao nga engineer dagiti amin a nangsuporta ken nagtalek ti kabaelanna nangruna iti Dios a Namarsua.
