Naikkat iti puesto dagiti 23 nga Army personnel, kalpasan a naduktalan nga adda pakainaiganda iti ipupusay ti neophyte soldier gapu iti maatap a “hazing” wenno “reception rite” idiay Maguindanao del Sur.
Sigun iti pannakangiwat ti Philippine Army a ni Col. Louie Dema-la, karaman kadagiti naikkat iti puesto ti company commander ti 6th Infantry Battalion nga ddaan iti ranggo a 1st Lieutenant ken maysa a platoon leader nga addaan iti ranggo a 2nd Lieutenant.
Maipalagip a kinumpirmar ti 6th Infantry Battalion a nag-collapsed ni Private Charlie Patigayon, baro a na-assigned a soldado iti 6IB kalpasan ti reception rites idi July 30.
Ti nasao nga aktibidad ket nabayag a tradision ti Philippine Army a mangpasangbay iti baro a miembro ti military community.
Dagus a naiturong ni Patigayon iti kaasitgan nga ospital ken naipasidong iti intensive care ngem pimmusay metlaeng gapu iti kidney failure.
Sigun pay iti pannakangiawat ti Philippine Army, nangisayangkatda iti imbestigasion tapno mabigbig dagiti responsable.
Inkarina iti publiko nga ipaay ti nasao nga ahensia ti hustisia iti biktima ken madusa dagiti responsable.
Kabayatanna, nangipaulog ni Armed Forces of the Philippines Chief Romeo Brawner Jr. iti “uncompromising directive” kadagiti amin a yunit tapno itandudoda ti highest standards of military conduct and discipline, ken ilaksid ti amin a kita ti hazing, pisikal a panangabuso, maltreatment, ken degrading treatment.
