BAGUIO CITY – Na-stranded ti 23 nga indibidual sadiay San Quintin, Abra kalpasan a saan a napalubusan daytoy a makastrek iti probinsia gapu iti maipatpatungpal a travel ban a maitunos iti manarimaan nga Enhanced Community Quarantine iti entero a Luzon gapu iti COVID-19.
Maibasar iti report, nagtalinaed dagitoy iti naipatakder a tent iti ruar ti Tangadan Tunnel.
Kinuna ti maysa kadagitoy nga idi March 20 a rinugianda ti nagna, naglugan kadagiti delivery trucks ken nagpatulong kadagiti nalabasanda a lokal a gobyerno tapnu laeng makaawidda sadiay Abra.
Naamuan a dagitoy ket nagtaud sadiay National Capital Region, Bulacan ken Baguio City a bukbuklen dagiti estudyante ken mangmangged nga agawid sadiay Tineg, Tayum, Dolores, Pilar ken Bangued.
Iti met panakiyuman ti Bombo Radyo Baguio kenni PCol. Alfredo Dangani, dadaulo ti Abra Provincial Police Office, inlawlawagna a napalubusan metlaeng a makastrek sadiay Abra dagiti nasao nga indibidual ken nakaawiden dagitoy.
Sigun kenkuana, adda laeng ti saan a nagkinna-awatan dagiti mangimanmando iti quarantine checkpoint ken dagiti nasao a residente.
