BAGUIO CITY – Inaprobaranen ti Philippine Sports Commission (PSC) ti agarup 23 a playing venues para iti national finals ti Batang Pinoy a maangay ditoy siudad ti Baguio.
Sigun kenni City Sports Coordinator Gaudencio Gonzales, impaayen ti technical staff ti komisyon ti panangaprobarda iti nagduduma a playing venues ti Batang Pinoy – national finals inton September 15-21.
Nupay kasta, kinunana a bigbigbigenda paylaeng dagiti agserbi a venues para iti cycling, sepak takraw ken triathlon wennio duathlon.
Innayonna a nakasaganan ti siudad ken iti panangipaay ti komisyon iti panangaprobarda kadagiti naisingasing a playing venues ket kaipapananna a maituloy ti panaka-angay ti nasao a tinawen a national sporting event ditoy siudad.
Dinakamatna a karaman kadagiti nakumpirmar a playing venues ti Baguio Athletic Bowl para iti athletics; ti swimming pool facility; dagiti gyms dagiti nalalatak nga unibersidad iti siudad para iti indoor volleyball, basketball, table tennis; ti multi-purpose hall ti BENECO para iti chess ken ti covered court ti Engineer’s Hill para iti Pencak Silat.
Maipalagip nga idepensa ti siudad ti Baguio ti over-all championship daytoy idi 2016 iti Batang Pinoy- National Finals a naangay sadiay Tagum City, Davao Del Norte.
