BAGUIO CITY – Ipampannakkel ti pamilya Abibico ti anakda nga army officer a pimmusay iti panangispal daytoy iti kadwana a soldado a nadangran iti engkwentro iti nagbaetan ti tropa ti gobyerno ken dagiti rebelde a New People’s Army sadiay Carabalan, Himamaylan City, Negros Occidental.
Nabigbig daytoy a ni 2LT Ralf Abibico, 24-anyos, manipud Bauko, Mountain Province, graduate ti PMA Class of 2018.
Iti interview ti Bombo Radyo Baguio iti amana a ni Police Executive Master Seargent Dionisio Abibico Jr., kinunana a nasakit kadakuada ti napasamak.
Nupay kasta, kinunana a naragsakan isuna idi naamuanna a pimmusay ti anakna bayat nga ar-aramiden daytoy ti sinapataan daytoy a trabaho.
Sigun kenkuana, natamaan ti anakna bayat ti panangtulong daytoy iti kadwa daytoy a soldado nga immuna a tinamataan dagiti kalaban nupay naamuan a pimmusay metlaeng ti nasao a soldado.
Innayonna a kasapulan nga akseptarenda ti napasamak kenni Ralf gaputa nayon a risgo wenno peggad daytoy ti trabahona.
Naamuan nga agawid kuma sadiay Mt. Province ni Ralf tapnu agbakasyon kalpasan ti operasyonda gaputa nangun-una sadiay ti nobyana ngem saan a natuloy gaputa nadanunan ti ECQ iti Luzon.
Maipalagip nga agbambantay dagiti soldado kabayatan ti panakaiwaras ti tulong pinansial ti gobyerno iti sidong ti Social Amelioration Program idi binarsak dagitoy dagiti rebelde iti IED ken hand grenades a nagresulta iti engkwentro ken iti panakapasag ti tallo a soldado.
