BAGUIO CITY – Nangrugin ti 24/7 free ride wenno libre a transportasyon para kadagiti health workers ditoy siudad ti Baguio.
Kas maitunos iti Regional Office Circular No. 2021-006 ti LTFRB-Cordillera, uppat nga yunit ti modernized jeep manipud iti Baguio Benguet Transport Cooperative ti nadutukan a maaramat iti nasao a serbisyo.
Nangrugi ti libre a transportasyon para kadagiti health workers iti alas sais idi agsapa, April 27 ken 24/7 ti panagserbisyo dagiti lugan.
Sakupen ti ruta ti Pines City Doctor’s Hospital – Magsaysay Avenue – Santo Niño Hospital – Lower P. Burgos – Buhagan Road – F. Yandoc Street – Chuntug – Harisson Road – BGH – Governor Pack Road – UP Drive – T.M. Kalaw Street – North Drive – Leonard Wood Road – Post Office Loop – Fr. Carlos Street – General Luna Road – Magsaysay Avenue – Pines City Doctor’s Hospital.
Kwalipikado iti libre a transportasyon dagiti amin a health care workers kas kadagiti medical professionals, utility workers kadagiti medical centers/clinics/hospitals ken auxillary work force iti health industry.
Kasapulan laeng nga iparang dagitoy ti kaseknan nga ID para iti panakabigbigda.
Nailanad pay iti paka-ammo ti LTFRB-Cordillera a sumarunon to ti dadduma a ruta iti masakupan ti rehion Cordillra a mangidiaya iti kapada a serbisyo para kadagiti agtatrabaho kadagiti medical/health care facilities/clinics.
Manamnama met nga agleppas ti nasao a programa inton June 30, 2021.
Para iti kanayonan a salusod, mabalin nga i-contact ti LTFRB CAR Project Implementation Unit iti numero a 0949-691-6102 wenno iti FB page ti ahensia.
