BAGUIO CITY – Naibilinen ti panakasukimat dagiti amin a lugan nga agbibiahe iti uneg ti siudad ti Baguio.
Iti panakiyuman ti Bombo Radyo Baguio kenni PMaj. Oliver Panabang, dadaulo ti Traffic Enforcement Unit ti Baguio City Police Office, kinunana nga epektibon ken nangrugin ti 24-hours a checkpoint kas paset ti Enhanced Community Quarantine iti entero a Luzon gapu iti COVID-19.
Kinunana a nainget nga ipatungpalda dagiti amin a pagalagadan a maiyulog kadakuada, pakairamanan dagiti maipawpawil ita a panawen iti benneg ti transportasyon.
Sigun kenkuana, karaman ditoy ti ‘no mask, no entry’ policy, social distancing ken permit dagiti agbiahe.
Inyunay-unayna metlaeng ti saan nga iruruar iti pagtaengan dagiti residente nga awanan met iti napateg a gandat iti ruar ti balayda.
Kabayatanna, dinakamat ni Maj. Panabang a walo a units ti taxi ti napatgan nga agbiahe ken mangidiaya iti special taxi service ditoy siudad.
Kinunana a dagitoy ti agserbi a transportasyon dagiti agkasapulan ti medical service kas kadagiti apan iti ospital nga agpa-agas.
Nupay kasta, binallaaganna dagiti nasao a taxi units iti saan dagitoy a panangidiaya iti dadduma a serbisyo malaksid iti nailanad iti special permit dagitoy.
