BAGUIO CITY – Minultan ti Department of Labor and Employment (DOLE) – Cordillera ti Chinese contractor ti manarimaan a P4.3-B Chico River Pump Irrigation Project sadiay probinsia ti Kalinga ken dagiti 25 a Chinese workers daytoy gapu iti panaglabsingda iti labor laws ti Pilipinas.
Sigun kenni DOLE-Cordillera regional director Exequiel Ronnie Guzman, linabsing dagiti nasao a gangannaet ti maikalkalikagum nga alien employment permit para kadagiti foreign workers nga agtatrabaho ditoy pagilian.
Kinunana a dagiti 25 a Chinese workers ket namulta iti sag-P10,000 gapu iti panagtrabahoda ditoy pagilian nga awanan ti kaseknan a permit.
Namulta met ti China CAMC Engineering Company Limited a kontraktor ti nasao a proyekto iti dumanon P250,000 gapu iti panangimpleyona kadagiti foreign workers nga awanan ti kaskenan a permits manipud iti DOLE.
Imbilin pay ti DOLE-Cordillera ti panagaplikar dagiti nasao a gangannaet iti alien employment permit.
Naamuan a maipaspasidongen iti regular a proseso ti nasao nga aplikasyon dagiti gangannaet iti maseknan nga opisina.
Immunan a sinertipikaran ti National Irrigation Administration a highly technical ti trabaho dagiti nasao a gangannaet iti Chico River Pump Irrigation Project bayat a naamuan a ti kontraktor ket tagikua ti gobyerno ti China.
