BAGUIO CITY – Nakailista ti Provincial Social Welfare and Development Office (PSWDO) – Benguet iti sangapulo ket siyam a kaso ti panagrames ken innem a kaso ti incest rape manipud Enero agingga ita a bulan ti Mayo.
Sigun kenni Juana Bannawe, dadaulo ti nasao nga opisina, saan nga adayo ti nasao a datus no iti nailistada a sangapulo ket innem a kaso ti panagrames ken innem a kaso ti incest rape iti kapada a panawen idi napalabas a 2017.
Kinunana a nailista ti kaaduan a kaso wenno sag-innem a kaso ti panagrames sadiay Bokod ken Tuba bayat nga uppat iti La Trinidad ken iti incest rape ket dua iti Tuba bayat a saggaysa iti dadduma a munisipyo kas iti Itogon, Mankayan ken Tublay.
Dinakamatna a kaubingan a biktima iti panagrames ket agtawen iti dua ken kaaduan a biktima ket agtawen iti uppat agingga sangapulo ket uppat bayat a dagiti biktima iti incest rape ket agtawen iti sangapulo agingga sangapulo ket innem.
Nagtalinaed met a dagiti suspek ket mismo a kapamilya, gayyem ken kaaruba ti biktima malaksid pay kadagiti saanda nga am-ammo.
Nagyaman pay ni Banawe gaputa kadagiti amin a kaso ket 16 ti naipila iti korte bayat a dagiti dadduma ket narisut babaen iti amicable settlement.
Innayonna nga agtultuloy latta ti panangipaayda kadagiti programa para kadagiti biktima ti panagrames ken ninayonanda pay dagitoy iti panangipasidongda kadagiti nagannak iti seminar seknan iti responsible a panagbalin a nagannak.