BAGUIO CITY – Dumanon iti duapulo ket lima nga indibidual ti nailista ti Baguio City Health Services Office a nagpositibo iti HIV/AIDS ita a tawen.
Iti panakiuman ti Bombo Radyo kenni Dr. Celia Flor Brillantes manipud iti nasao nga opisina, kinunana a karaman iti nasao a bilang ti maysa a masikog a nakaptan iti nasao a sakit, dua ti lalaki, bayat a duapulo ket dua dagiti lallaki a makinanaig iti padada a lalaki.
Kinunana tallopulo a porsiento ti posibilidad a maapektaran ti sikog ti babai ngem mabalin daytoy nga agtumar iti anti-retroviral tapnu malapdan ti panakaiyakar ti sakit iti maladaga.
Kinunana met a ti nangato a bilang dagiti men-having-sex-with-men wenno MSMs ket pammaneknek nga adu latta dagiti saan nga agar-aramat iti condom iti anal sex.
Kinunana a daytoy ti maysa a nasken a matutokan nangruna ta umub-ubing dagiti makapkaptan iti HIV/AIDS ken ti kaubingan kadagiti nailistada ket agtawen iti sangapulo ket siyam.
Gapu iti daytoy ket ginuyugoyna ti publiko nangruna dagiti addaan iti aktibo a sex life nga agpaisidongda iti libre nga HIV testing nga ipatpatungpal ti opisina dagitoy tapnu maipaayanda iti anti-retroviral ken saanda nga akaran ti dadduma nga indibidual.
