BAGUIO CITY – Nakakumpiskar ti City Veterinary Office iti 253 a kilo ti nagduduma a karne manipud iti Baguio City Public Market.
Sigun kenni Cesaria Buayan, meat inspector ti nasao nga opisina, kinumpiskarda dagiti nasao a karne gapu iti mishandling.
Kinunana a nakakumpiskarda pay iti sumagmamano a bombilya gaputa dagitoy ket saan a maitunos iti kalikagum ti linteg.
Inlawlawgna nga adda ti maikalkalikagum a kita ti bombilya a nasken nga aramaten dagiti vendors tapnu rumuar ti pudno a maris dagiti karne ken saan a maallilaw dagiti gumatang a konsyumer.
Immuna iti daytoy, dinakamat ni City Veterinarian Dr. Brigit Piok nga inaldaw ken regular ti inspeksionda iti merkado publiko ti siudad tapnu maipanamnama a sadiwa ken nadalus dagiti karne a mailaklako sadiay.