Pakabuklan a duapulo ket innem a ganggannaet a mangmangged iti iligal a Philippine Offshore Gaming Operators (POGOs) ti naipasubli kadagiti pagilianda itay laeng kanikadua, sigun iti Bureau of Immigration (BI).
Dagiti naipasubli ket paset iti 450 foreign nationals a natiliw idi Enero gapu iti panaglabsingda kadagiti linteg ti immigration ti Pilipinas, partikular dagiti karaman kadagiti scams a mainaig iti POGO.
Kadagiti duapulo ket innem a naipasubli, duapulo ket tallo ti Chinese nationals ken tallo ti Malaysians.
Impasigurado ni BI Commissioner Joel Anthony Viado a papanawenda amin dagiti agar-aramid ti iligal iti Pilipinas.
Binallakadanna met dagiti ganggannaet a makipaspaset iti iligal nga operasion ken dagiti saan nga otorisado.
Maipalagip nga impawil ni President Ferdinand “Bongbong” Marcos Jr. idi Hulio idi napalabas a tawen ti amin a POGO kalpasan a sumagmamano a negosio ti nairaman kadagiti krimen, pakairamanan ti human trafficking, serious illegal detention, ken money scams.
