Dumanon iti 27 a colorum motor vehicles ti natiliw manipod Mayo 1 agingga Hunio 20, 2025 iti Baguio City.
Daytoy ket resulta iti agtultuloy a nainget a kampania ti gobierno kontra kadagiti colorum a lugan.
Sigun kenni Baguio City Mayor Benjamin Magalong, maipatpatungpal ti kampania babaen ti panagtitinnulong ti Dept. of Transportation- Cordillera (DOTr-CAR) iti sidong ni Regional Director Glenn Dumlao, Traffic and Transportation Management Division ti City Engineering Office ken ti Baguio City Police Office iti sidong ni City Director Police Colonel Ruel Tagel.
Iti immuna a surat ni Acting City Engineer Richard Lardizabal, impakaamona kenni Dept. of Transportation- Cordillera Regional Director Glenn Dumlao maipapan iti panagadu dagiti colorum van nga agop-operate iti siudad.
Simmungbat met ni Mayor Magalong kenni Dumlao a nangted iti kaudian a damag iti agtultuloy nga operasionda.
Impakaamo pay ni Dumlao kenni Mayor Magalong ti direktibana para iti dagos a pannakarisut ti amin a kaso nga adda pakainaiganna iti iligal a panag-operate dagiti lugan nga addaan iti maximum a multa a P200,000.
Dagiti colorum a lugan ket kadawyan a public utility vehicles (PUVs) nga agop-operate nga awanan ti permit wenno prangkisa, wenno dagiti agop-operate iti ruar ti saan nga otorisado a rutada.
