BAGUIO CITY – Sumangsango iti kaso nga estafa ti maysa a lalaki kalpasan nga inreklamo ti dua nga indibidual a biniktimana iti online investment scam.
Nabigbig ti suspek a ni Kevin Dale Mergas, 27-anyos, maysa a seaferer ken residente ti Tibag, Tarlac.
Maibasar iti salaysay dagiti biktima, indiaya ni Mergas ti 50% nga interes wenno doble pay kasukat ti pangiserrek dagiti dua ti kwarta iti online business daytoy rason nga impaayda ti P317,000.
Nupay kasta, nadlaw dagiti biktima nga adda ti kamali iti nasao nga investment rason a kiniddawda nga isubli ni Mergas ti kwartada.
Kinuna dagiti biktima a plano ni Mergas nga aglebas rason nga indulinda ti susi ti luganna ken daduma pay a dokumento ken dagus nga inyumanda kadagiti otoridad a nagresulta met iti panakatiliw daytoy.
Naduktalan iti imbestigasyon ti Tabuk City Police Station nga adda metlaeng ti immuna a kaso ni Mergas iti online scam ken naamoan pay a ti lugan nga inaramatna a nagturong sadiay Kalinga ket nacarnap iti maysa a rent agency sadiay Valenzuela.
Gapu iti daytoy, balbalaagan manen ti pulisya ti panagridam ti publiko kontra iti online investment scam tapno saan a maipada a mabiktima iti nasao a modus.
