BAGUIO CITY – Adu ti nagserbi a karit para iti maysa a kailian tapnu agala iti kinaabogasya iti maysa kadagiti unibersidad ditoy siudad ti Baguio.
Iti panakaiuman ti Bombo Radyo kenni Atty. Darriel Baclili a maysa kadagiti pimmasa iti November 2016 bar exams, kinunana a nagserbi a karit kenkuana ti kinarigat ti biag ken ti tarigagayna a maipaayan iti napintas a panagbiag ti pamilyana.
Kinunana a kabayatan ti panagtrabahona kas agent ti PDEA-Cordillera ket nangala daytoy iti kinaabogasya iti University of Baguio idi 2012.
Innayunna a narigat ti panangigiddanna iti panagtrabahona ken iti panagadalna gaputa kasapulan ti time management, anus ken sakripisyo.
Nupay kasta, inan-anusanna dagitoy agingga a nagbunga ti sakripisyona.
Kinunana met nga ita a nakapasa daytoy iti bar exams ket silulukat daytoy iti anyaman a posibilidad ngem tarigagayna latta ti agtalinaed iti PDEA gaputa sadiay ti nagrugian ti balligina.
Ni Atty. Baclili ket 27-anyos, taga Bauko, Mt. Province, nagturpos iti kurso a criminology iti Mountain Province State Polytechnic College, ken pimmasa iti board exam.
Kalpasan a nakastrek iti trabaho ket sinuportaranna dagiti lima a kakabsatna iti panagadal dagitoy ken dua kadagitoyen ti nakaturpos iti kolehiyo, ti dua ket agad-adal pay laeng iti kolehiyo bayat a ti maysa ket adda pay laeng iti sekondarya.
