BAGUIO CITY – Manamnama a saanen a mapasaran ti nangato a temperatura iti siudad ti Baguio kasaruno ti pormal a panakaideklara ti rainy season wenno panagtutudo iti pagilian.
Iti panakiuman ti Bombo Radyo Baguio, imbinglay ni PAGASA-Baguio weather observer Louie Vergara a ti kaudian a nailistada a kangatuan a temperatura iti Baguio ket ket 28.8°C idi May 14 ken posible a daytoyen ti kangatuan a temperatura para iti siudad ita a tawen.
Kinunana a kagiddan ti panagrugi ti panagtutudo ket mariknan ti panagbaba ti temperatura nangruna iti malem ken parbangon.
Nupay kasta, inaklonna nga adda met latta dagiti gundaway a marikna ti nabara a panawen ngem saan a kas iti kabara a napasaran iti nagsasaruno nga aldaw idi napalabas a bulan ti Mayo.
Maibasar iti record ti PAGASA-Baguio, nailista ti kangatuan a temperatura ti Baguio City idi March 15, 1998 a dimmanon iti 30.4°C.
Pormal metten nga indeklara ti PAGASA ti rainy season idi kalman para ita a tawen kalpasan nga inguyod ti bagyo a Dante ti southwest monsoon wenno habagat a mangituntunda iti panagtudo ita iti pagilian.
